由王偉仁（Simon）監製、陳可兒、李昊編審的時裝靈異輕喜劇《鼎植口腔呈獻：香港探秘地圖》（以下簡稱《探秘地圖》），本星期一至五晚八點半翡翠台播出結局篇。9日一集莊一臣（黎耀祥飾）開始發功「狙擊」龍貴（袁文傑飾），並成功動搖了金夫人（楊玉梅飾）對龍貴的信任，而金夫人愛子金年（關曜儁飾）的生死，將是《香港探秘地圖》結局周最關鍵劇情。

　在結局周佔戲極重的楊玉梅（士多啤梨），相當搶戲，皆因飾演貴婦金夫人的她，無論「牛角髻」髮型或是超鮮艷造型均相當Impressive，若細心留意，更不難發現士多啤梨昨晚兩大造型—Satin貼身連身裙，及超貼身紅色褲均相當蝦人著，但現年61歲的士多啤梨卻Carry得相當好，接近零唧肉狀態，弗到漏油，難怪有網民讚她靚女。談到金夫人，士多啤梨受訪時坦言「好好玩」，並笑言作為演員，就是喜歡嘗試不同類型的造型：「尤其係個髻，呢個髮型既有古裝又有民初Feel，啲衫嘅顏色係難Carry嘅，尤其我哋呢啲年紀，會搞到好誇張咁。但因為我不嬲鍾意colourful啲，我屋企都好多colourful嘅衫，所以我自己試造型時覺得好靚。我覺得演員可以試唔同造型係好開心嘅事。」士多啤梨續指由於「牛角髻」造型setup需時，故她每次都會提早2小時化妝預備：「唔想遲咗要其他人等，相當專業。」

　根據網上資料，士多啤梨至今仍保持100磅以內的完美身材，除了飲食清淡，士多啤梨還有恆常運動，每次持續2小時，並考獲了國際瑜伽導師牌。談到保健養生心得，士多啤梨笑言最緊要開心：「飲多啲水，我不嬲唔煙唔酒唔食藥，我鍾意天然同古法嘅養生同治療。因為我選美嗰陣攞咗最上鏡同埋完美體態，所以我成日Remind自己唔好走樣走得太過份，要對得住當年嘅評判。」談到拍攝趣事，士多啤梨笑言除因頂著誇張造型外出吃飯時惹來「奇異目光」，亦試過在荒山野嶺拍戲時遭蜘蛛網纏身，令她覺得有點恐怖：「但其實工作人員好好架，佢哋喺我哋去拍之前，有專登幫我哋除蟲同埋清咗一浸蜘蛛網。」

　另一位弗到極代表，還有我們的視帝黎耀祥祥哥。劇情講述一臣因激嬲王秀儀（倪嘉雯飾）另一人格「Sa姐」，遭追足幾條街兼被「Sa姐」死練住唔放，十分刺激；而現年62歲的祥仔，在場口中同時展現了驚人的敏捷身手及跑速，令網民不禁驚嘆演得、跳得兼且跑得的祥哥寶刀未老。談到昨晚喪跑戲，祥哥謙稱是幕後武指及攝影師功勞，才能他看上去跑速極快：「我都唔係好弗架咋，鏡頭上感覺，因為場口有武指在場，而好多效果都係鏡頭上嘅配合。我平時都有小小運動、有啲底，但都要靠工作人員同鏡頭配合，自己拍嘅時候都係盡力去做啦。」祥仔續指場口難度在於拍攝時下雨，但與Carmen要在又濕又熱的環境、及障礙物頗多的後巷中追逐。

　另倪嘉雯亦繼續發功搶焦點！她在劇中激罕以齊蔭黑長髮Look現身，配以天真感滿滿的甜笑，勁Pure勁True，獲網民洗版式大讚「Gfable」；除了「開心少女」樣，Carmen另一「濃妝惡女」造型同樣省鏡，網民亦大讚「黑色卡文好正」，兼讚她「淡妝濃抹總相宜」。◇