2026年6月2日，沙田香港文化博物館，一場「幸會25歲──香港電影資料館珍藏展」開幕典禮上，出現了一個意想不到的身影。有「美艷親王」之稱嘅粵劇名伶羅艷卿，坐住輪椅現身，精神奕奕。佢話自己好少出街，今次係因為收到好多朋友邀請，先破例出來見大家。

　「平時我唔會出街㗎，跌跛隻腳好慘。」羅艷卿苦笑透露，自己虛齡已經101歲，早前不慎跌傷腳，行動唔方便，姪孫好乖，唔畀佢郁，連衫都係姪孫同徒弟買畀佢着。雖然出入要坐輪椅，但佢嘅精神狀態非常好，講起舊事仲會笑。

　佢睇展覽時勾起好多回憶。尤其係五十年代同梁醒波拍戲嘅日子，佢話：「以前拍戲晨早呱呱嘈，嘈生晒！你又咁、我又咁，唔三唔四，又成日搶嘢食，真係好熱鬧！」想當年合作過、做過佢個仔嘅，今日都變晒大個仔。

　講到日常生活，羅艷卿笑言最開心嘅就係約朋友打麻雀同食午餐。記者問佢係咪成日贏，佢耍手擰頭：「冇呀！我成日『走雞』㗎！不過最緊要係同朋友開心相聚。」尋日就成十個朋友去佢屋企食飯，佢話：「冇所謂，大家兄弟姊妹咪玩埋一齊，有乜食乜。」平日佢仲最鍾意睇電視，話「電視係老人嘅良藥」，乜嘢節目都睇。

　問到會唔會去捧老友胡楓嘅紅館演唱會，羅艷卿話自己平時夜晚六七點就瞓覺，好難去夜晚場。但當佢得知修哥會開下午場，即刻笑住話：「叫姪孫帶我去，都想去睇吓佢！」◇