第17屆澳門國際電影節暨第16屆澳門國際電視節日前喺澳門舉行，頒獎典禮星光熠熠，現場雲集章子怡、黃軒、葛優、謝天華及曹斐然等重量級嘉賓。張兆輝上月剛憑《空心人》喺溫哥華華語電影節榮獲「最佳男主角」，再度傳來捷報，於本屆電影節榮獲「金蓮花優秀男演員獎」。

　輝哥憑彭發導演執導嘅驚慄片《空心人》再下一城，受訪時難掩喜悅之情：「非常開心，亦相當驚喜，衷心感謝觀眾對《空心人》嘅支持與認可。」問到接連奪獎點樣慶祝，輝哥笑言：「方式好簡單，先靜靜喺屋企冥想，回味拍攝時點滴，覺得十分滿足。當然會同屋企人一齊食餐飯、舉杯分享喜悅。」

　談及未來目標，輝哥坦然已做好退休計劃，呢幾年只想盡力做到最好，遇到好角色就用心演繹，希望呢幾年不斷帶畀觀眾新鮮感，亦為自己留下一啲將來嘅回憶。提到拍攝《空心人》時面對嘅挑戰，輝哥感謝彭導喺開拍前，同大家深入溝通角色要求，讓演出時嘅難度降至最低，各人全情投入每場戲，即使戲中情緒沉重、令人心碎，當演員達到導演嘅要求，事後回想仍然會好享受。

　輝哥透露拍攝完大約一個多月，靜落來仍會浮現戲中唔開心嘅片段，自己會主動搵朋友傾偈或出門跑步，唔好畀自己沉溺喺戲裡面，慢慢抽離陰鬱角色，而聖誕與新年將至，輝哥話節日期間仍要工作，參與跨年活動，期待之後能稍作休息，並祝願大家過一個愉快聖誕，迎接新一年。

　另外，喺英國讀書嘅孻女張卓姿趁聖誕假期返港陪伴家人，更兩度擔任輝哥助手，分別現身南沙音樂會及澳門電影節。兩父女合作默契十足，更有粉絲喺現場認出張卓姿，偷拍照片上傳分享，可見佢尚未正式入行，已吸引不少關注目光。

　張兆輝於驚慄片《空心人》飾演一位痛失愛子、陷入深淵嘅父親，與王敏奕飾演嘅妻子共同經歷靈異事件，影片聚焦都市情緒病議題，輝哥為支持導演更將片酬投資至電影中。◇