由衛駿輝、黃德斌、羅妍、梁非同、陳景銣、黃安晴、蘇楚欣和馬溢霞擔綱演出，「進念‧二十面體」製作，陳善之監製，胡恩威執導及改編陳敢權原著劇本，加上楊健平以粵劇改編及作曲的全新摩登粵劇《頂頭鎚》，將於今個星期四至日（11月13-16日）晚上8時正，以及11月15日（星期六）下午3時正，在香港文化中心大劇院上演，票價分別是$680、$480、$280、$180四種，現尚餘少量門票於進念購票平台和城市售票網公開發售。

　彩排工作已進入最後階段，飾演鄭開滿的著名粵劇文武生衛駿輝說：「點樣用時裝戲去演繹粵劇裏面的男生對我來講係一個新挑戰，如果有穿戴的道具就梗係幫到我，但以時裝形式表演的話，無論我哋係企同埋演繹都要揣摩，對於我來講真係一個好新的嘗試，同埋都係一個好好的機會去學習原來新派粵劇可以咁樣做，希望大家可以來文化中心支持我的《頂頭鎚》，點樣一個頂十個。」飾演一代亞洲球王李惠堂的黃德斌表示：「仲有幾日就演出，由排練開始到而家的心情都仲好緊張，因為其他演員本身係粵劇演員，功㗎同唱功都好熟練，我一直希望可以投入同融入到佢哋果種感覺。導演仲突然同我講有段戲要我清唱，咁就更加增加我的壓力，呢個壓力對我黎講都係一個動力，希望大家到時來文化中心支持《頂頭鎚》。」

　劇中飾演梁國邦的新銳武生陳景銣說：「因為有Joe哥哥同劉千石先生的大力推薦，我好榮幸可以參與今次《頂頭鎚》的演出，由一直彩排到就快入台，心情係興奮同埋緊張，因為文化中心都係我的平時做粵劇的地方，但係今次在文化中心做的《頂頭鎚》有話劇的成份，呢種感覺既熟悉又陌生，期待將會呈現一個好的演出畀大家。」；藝齡已經有13年的羅妍：「我今次可以參加《頂頭鎚》係因為之前同善之哥哥合作過，我好少做呢類帶有話劇成份的製作，今次呢個製作都令我獲益良多，因為個表演形式係完全唔一樣，同埋可以同一班咁優秀的演員一齊合作，自己都可以學到人哋的優點，希望可以做好呢一次的角色。」飾演阿健的戲劇演員蘇楚欣（Sobi）:「今次係第一次做粵劇，亦都係第一次做男人，都係度摸索緊，因為我覺得自己係一個好女仔的女仔，所以要我扮男仔，我就不停的度嘗試，但我覺得好好玩，同埋粵劇裡面的功㗎真係一點都唔容易，所以我好開心今次有機會參與呢個演出。」飾演玉儀的旦角新星黃安晴：「我好開心今次有咁的機會，可以令我哋粵劇演員同話劇演員合作，真係學到好多嘢同啟發到我哋，因為藝術本身就係共通，粵劇有佢自己的一個範圍，好多人以為係在一個框框裡面，但係經過今次的合作，希望畀大家見到我的粵劇演員係有無限可能，而話劇本身的包容性亦都好強，範疇亦好廣闊，兩個劇種加埋1+1，其實等於無限的可能，希望大家係《頂頭鎚》見到呢個有趣的『可能性』同埋無限的火花。」曾榮獲藝術新秀獎，在劇中飾演煥璋的梁非同：「今次好開心導演畀機會我參加呢套摩登粵劇，因為呢套摩登粵劇係有別於我的傳統的粵劇表演。◇