日本、台灣、韓國呢啲旅遊熱點嘅旅行節目，係咪已經睇到有啲悶？如果帶大家去體驗富豪們嘅人間天堂，又或者係飽受戰爭嘅極端國家生活，大家又有冇興趣？由黃翠如Priscilla Wong主持、一連6集嘅體驗式旅遊節目《遊走世界天與地》，將會同觀眾一齊走訪瑞士、敘利亞、摩納哥及摩爾多瓦，體驗極端的事物、景貌同人情。

　首集翠如先帶大家享樂一下，嚟到被喻為「人間天堂」嘅瑞士。除咗會走訪瑞士南部山區嘅古老村落，參觀村中擁有700年歷史嘅古屋外，仲更會參觀喺50年前冷戰時期蓋建、堪稱全球最大防空洞「Sonnenberg Bunker（琉森LUCERNE）」。當然喺一個咁靚嘅景色下，翠如仲會一邊歎瑞士芝士火鍋、一邊欣賞靚靚山景外，同埋去喺二０一五年獲美國國家地理雜誌評為終身必去嘅「懸崖餐廳（Berggasthaus Aescher-Wildkirchli）」。

　嘆完世畀，鏡頭一轉翠如就會帶大家遊走戰火紛飛嘅敘利亞。自二０一一年爆發內戰後，敘利亞嘅內部激烈衝突仍然持續至今，雖然當局已經逐步放寬旅遊業，但係佢哋對外地人依家抱有一定戒心，所以當局除咗規定旅客必須由導遊全程陪同外，旅客正式踏入當地領土前，都必須經過徹底嘅背景審查，以攝製隊為例，當日佢哋就喺邊境足足等咗5個鐘先搞掂入境手續。

　62歲嘅導遊哈辛，帶領攝製隊走訪首都大馬士革（Damascus），其間仲喺自己佈滿子彈孔嘅住宅內，分享敘利亞戰爭前後嘅巨大生活變化。攝製隊又會深入飽受戰火摧殘嘅大小城市，巴士殘骸、被炸毁嘅建築物，呢啲都喺街頭隨處可見，但曝震撼翠如嘅係，喺近乎倒塌嘅樓宇入面，有一群向佢禮貌揮手嘅小朋友，情景溫暖得令人心酸。翠如事後都好感慨咁話：「我知道我唔可以問（佢哋發生咩事），因為我冇資格問。你見到佢哋好可愛咁對你笑，但你同時亦會覺得自己唔可以比佢哋更傷心，因為知道自己冇資格比佢哋更傷心......」隨住攝製隊去到帕爾米拉古城（Palmyra），氣氛由心酸而變成緊張，因為街上佈滿重兵駐守，而同行嘅導遊亦都不斷接獲軍方電話。

　節目以外，翠如亦喺IG分享咗於敘利亞等候入境期間，認識咗兩位新朋友，當中叫Anoud嘅敘利亞女孩，11年前因為內戰關係，9歲大嘅佢被逼逃亡同獨自留喺敘利亞的媽媽分開。相隔11年Anoud終於可以回家同媽媽重聚，翠如仲話當時Anoud對眼睛幾乎沒有離開過媽媽，到Anoud終於完成入境手續，可以回家時，翠如指呢句「回家」令佢聽起嚟有百般感受。

　《遊走世界天與地》逢星期一至三2二比三0翡翠台播映。◇