有「星爺愛將」之稱的藝人李尚正，相約香港開電視主播馬梓軒，到石澳遊覽定情樹和天后古廟等周星馳電影《喜劇之王》的拍攝場景，阿正表示：「我想嚟石澳，除咗因為星爺曾經喺度拍戲，亦因為我大學個陣嚟過呢度寫生！當時教授要我哋兩人一組，我就同咗一位無論樣貌、身材都一等一嘅女仔一組，然後就同佢去咗附近一個幽靜嘅地方寫生，呢個係我大學生涯嘅漂亮回憶！」

　阿正拍過多部星爺作品，不過令他最難忘的，不得不提電影《西遊．降魔篇》。事關在該戲飾演沙僧的他，突如其來要應付一幕全裸戲份：「原本唔需要嘅，但後來導演見我有資質，身形唔錯喎，咁我考慮咗一秒左右就拍啦！但其實我背後都有諗過，如果全裸，但自己又未去到某個水平，咁會唔會畀人笑呢？」

　此外，阿正又分享與星爺合作的回憶，被問及星爺是否不喜歡有人在開會時，重提昔日經典金句，阿正坦言：「星爺想要嘅嘢就係，反正都做，點解唔做一啲未做過嘅嘢？如果不斷重複，就違背咗呢個方向！開會個陣，如果星爺見我哋行返舊路，佢會推，會話得啦唔好講呢啲！」◇