​

「蘋果之夜」後感情升溫

 由「金牌媒人」林盛斌(Bob)主持的TVB戀愛真人騷《Funki Finance呈獻:女神配對計劃2》,周日晚8點35分翡翠台播映。

 22日播出的第十二集《女神2》,Oscar與Roxanne自從經歷了「甜爆蘋果之夜」,二人關係出現驚人進展,一向怕醜的Oscar一反常態約會Roxanne,不過由於二人太愛打鬧鬥氣,結果竟選了望落極刺激的「小丑過山車」。為人細膽兼甚少玩機動遊戲的Roxanne,臨出發前還口硬指自己經歷了水上瀡滑梯後,人生已冇嘢好驚,豈料遭Oscar「零秒寸爆」:「上次(瀡滑梯)你係唔應該驚架,然後(仲要)喊咗咯。」豈料,Roxanne還未坐上過山車,已連嗌兩次「好驚呀!」,結果原本自己好驚的Oscar,只能扮唔驚:「我都好驚呀,但佢又好驚喎,咁我做男人都應該要扮得唔係咁驚,等佢唔係咁驚。」

 為了安撫Roxanne,Oscar全程做到足,除出發前著Roxanne「唔使驚,有我喺度」外,當見到Roxanne一上車已嚇到花容失色兼連環尖叫,即伸出手讓Roxanne捉實;之後縱然自己都驚到狂嗌,仍盡全力關注Roxanne,不時望向女方之餘,中途見Roxanne嚇到「聲都冇埋」,一度在車速減慢時,爭取時間慰問及嘗試幫助Roxanne:「我keep住同你對話會唔會好啲?」、「你闔埋眼先,好快(完)」、「你o唔ok?」、「有冇唔舒服」,又出手拍打Roxanne大髀及膊頭予以安慰。Oscar的細心溫柔,令坐車時嚇到「失聲」兼面都青埋的Roxanne,事後坦言感到溫暖:「我覺得佢關注點喺我身上,而唔係淨係自己enjoy,我覺得warm嘅。」而向節目組透露自己零追女仔經驗的Oscar,整個約會除盡顯細心暖男面,又不時主動探問Roxanne喜好,與Roxanne傾偈期間又表現得用心聆聽,與之前的「怕醜仔」形象成強烈反差。

 Roxanne與Oscar還趁今次單對單約會,直面積累已久的「Emo」心結,Roxanne將首度披露害怕「Emo男」背後洋蔥真相,並透露曾因情緒問題,一度變得相當不理智,令Oscar聽畢大感心痛。◇