無綫旅遊節目《渣打優先理財呈獻:Grand住去首爾》由高海寧（高Ling）、周嘉洛及朱敏瀚擔任主持，三人帶領觀眾前往韓國首爾，體驗極致的吃喝玩樂，包括米芝蓮星級美食、人氣打卡熱點及奢華酒店等。節目一連三個星期六晚8點於翡翠台播映，14日播出最後一集。

　今集節目最大亮點，莫過於高Ling與陶藝型男Oppa約會。Oppa五官標致，外形高大健碩，十足韓星味道，高Ling第一眼已被對方外形吸引:「好安靜斯文，同埋操到自己好大隻。」不過與Oppa首次約會，即緊張到爆:「言語不通又唔認識，我係好慢熱嘅人，好難打開話題傾偈。」Oppa親手教高Ling整陶瓷花樽，二人手貼手一齊整，Oppa二頭肌盡現，又親手送上插滿鮮花的陶瓷花樽，行為舉止十足似拍偶像劇，畫面充滿幸福泡泡。二人又登船遊覽韓國迷人夜景兼飲靚酒，大談兩性關係感情問題，畫面浪漫到暈。高Ling全程冧樣盡現，笑到見牙唔見眼。

　節目另一精彩位，是嘉洛與朱仔身穿韓服，跟蹤高Ling與Oppa約會。雖然最後跟甩，但透過監控觀察到二人一舉一動:「有肌肉喎」、「摸手仔喎」、「陶瓷係第一日可以摸手仔嘅活動」，嘉洛更不時講韓文附和，非常爆趣。另值得留意的是，嘉洛到首爾最頂尖、韓星御用的美容店體驗韓妝，畫面極為搶Fo。嘉洛坦言對化Idol妝興趣不大，只抱住好奇心去體驗:「我哋係好明顯行內涵同靈魂。」經過韓國化妝師巧手改造，嘉洛五官輪廓變得更立體，髮型添上韓系俐落感，整體氣質即時升級。他再以真空上陣身穿西裝，胸肌盡現，以冷酷姿態在街道行走，極有韓星Feel，吸引不少韓國民眾影相，更有韓國民眾誤以為他是韓國男團SEVENTEEN成員玟奎。對於早前被指似玟奎，嘉洛再三耍手擰頭:「我強調佢靚仔過我好多，我同佢一啲都唔似。」

　節目播出後，嘉洛的表現引起不少網民討論，紛紛激讚他極有綜藝感:「佢真係好正，天生就有種綜藝感」、「搞笑天才嚟」、「佢勁有喜感，一出嚟已經覺得佢調皮會玩」、「注定天生食呢行飯」，可見嘉洛的表現成功入屋。

　節目中，高Ling還走訪首爾北村一間具有一百年歷史的韓屋探索韓國茶禮，又入住首爾第一高樓樂天世界塔內位於92樓的韓式套房，欣賞高空美景之餘，亦可感受韓國宮殿美學。

　另外，嘉洛與朱仔撇甩高Ling，雙雙扮鰻魚去鰻魚餐廳大歎美食，場面非常搞笑。◇