MIRROR成員李駿傑Jeremy與COLLAR成員Marf邱彥筒推出全新合唱單曲《Whistle》，以極具感染力的節奏與主題，帶領聽眾藉由吹口哨拋開生活壓迫。口哨聲作為人類祖先最原始的聲響之一，發展至現代已成為傳遞輕鬆自在、釋放壓力的生活語言。今次兩人強強聯手，期望透過作品帶領大家放下繁瑣，一同沉浸在音樂與舞蹈之中。

　《Whistle》由外國音樂人ADILE作曲及編曲、梁栢堅填詞、徐浩監製。提及今次合作的起源，Jeremy透露其實早在兩年前的《MATCHICAL LIVE 2024》演唱會中，兩人於Opening合作跳舞已覺得彼此非常合拍，自此便存有推出合唱作品的念頭，時隔兩年終於實現。Jeremy說：「《Whistle》班底好特別，歌曲最主要想講，當大家一聽到口哨聲嗰陣，就可以一齊Enjoy呢個Moment，一齊去跳舞、放鬆同開心！」Marf坦言接到邀請時非常興奮：「自從上次《MATCHICAL》之後，已經好鍾意我哋喺舞台上面嘅感覺！我覺得我哋兩個嗰種中性風格好類似，擦出嚟嘅火花好正，所以期待咗好耐！今次係Jeremy踏出第一步，跟住我哋就一齊搵Demo。」

　除了舞台上的火花，兩人私底下的交流進一步加深。談到對Marf的印象，Jeremy說：「一開始覺得Marf比較高冷、冇咁容易接近，但深入接觸後發現佢其實好可愛，好多自己嘅小宇宙同諗法，係一個好叻嘅女仔！而且佢對作品所有細節，無論係歌曲、造型定細節處理都好著重、好認真。」Marf亦大讚Jeremy體貼、隨和：「之前排練冇時間深入傾偈，但已經覺得佢係一個好Caring嘅人。最近睇返網上片段，先發現嗰陣因為我隻腳有啲唔舒服，佢喺台上台下都好照顧我，真係好擔心我會唔會踩錯腳。到今次合作發現佢超級隨和，只要順順利利唔麻煩大家就OK！佢係一個好想試新嘢、但偶爾會有小小缺乏安全感嘅人，但我哋平衡得好好，我可以畀到好足夠嘅Support佢，我好唔介意去作鬼鬼怪怪嘅新嘗試。」

　至於錄音方面，今次作品採用了分開錄音的形式進行，先由Jeremy錄製第一個版本，Marf聽著對方的聲音與能量跟著錄音，最後Jeremy再配合Marf的錄音版本進行調整與堆疊。Marf直言過程十分有趣，令歌曲呈現出獨特的聲音互動。

　繼《黑蛇傳》及邀請Tiger拍攝MV的《I Played me like a fool》後，Jeremy於2026年持續帶來充滿新鮮感的企劃。問到今年接下來還有沒有新驚喜給粉絲，Jeremy賣關子笑言：「今年做咗好多唔同嘅作品，至於2026年仲有冇新驚喜就係秘密嚟嘅，睇吓做唔做到啦！」◇