黃子華、吳鎮宇與張達明相識多年，當年棟篤笑《鬚根Show》風靡一時，呢個黃金組合成員喺二０００年舉辦《鬚根Show2》時，講明呢個組合唔再合作演出，隨後三人各自發展，多年來深厚友誼不變，近日三人久別重逢飯敘，吳鎮宇兒子Feynman亦開心分享達明近照。

　照片見到當日黃子華喺餐廳內疑幾杯落肚飲到面紅紅，臉容略帶呆滯，露出飲醉一面。而成功抗癌嘅達明身形消瘦，只不過當晚佢精神奕奕同鎮宇開心手持酒杯，與老友影合照。有指子華與鎮宇喺達明患癌期間給予好多幫助，三人不僅係事業上嘅好拍檔，仲係人生路上陪伴經歷高山低谷嘅摯友，絕對係演藝圈難能可貴嘅友情。

　達明於二０一一年確診鼻咽癌後一直與病魔搏鬥，身形瘦削單薄，近年抗癌成功逐步復出幕前，因癌症治療留下嚴重後遺症，因療程而變得口齒不清，雖然對演戲講對白造成困難，但達明仍熱愛演藝工作，積極面對人生，不時出席活動。◇