林敏驄喺3月27日踏入67歲，雖然一把年紀，但驄哥嘅玩得又無厘頭嘅性格依然不變，熱愛打高爾夫球嘅驄哥，喺生日當然唔少得同一班高球之友打返場友誼波，享受下一杆入洞嘅快感啦﹗而呢日嘅主打就梗係唔少得一班好友包括區瑞強、尹揚明、張兆輝等同驄哥賀壽，由日頭打波直落到夜晚食飯。

　壽星驄哥生日唔單只特別旺，而且個個都畀返幾分面子，多年前喺電影《古惑仔》中飾演韓賓聞名嘅尹揚明一直同驄哥老友鬼鬼，佢特別引用角色同驄哥送祝福：「韓賓祝你生日快樂。」神情語氣依然有當年風範，又押韻祝驄哥「生日打個趴，唔使畀人蝦」。見驄哥喺球場上雖然身水身汗，但能夠同一班老友相聚格外開心。

　到食飯時一班好友又為驄哥送上生日蛋糕同鮮花，尹揚明帶頭唱生日歌搞氣氛，驄哥一邊嘆雪茄，更獲贈一枝自己出生年份1959年；市價要成近四萬港幣嘅靚Lafite紅酒，難怪驄哥玩得咁盡興。羅家英雖然未能現身到賀，但都有拍片祝賀老友。◇