三子參與HOY大型音樂企劃《歲月如歌》，將於周日晚播出。他們除了唱自己的經典作之外，還演繹了師傅梅艷芳及陳百強的作品：「佢哋兩個都係廣東樂壇中非常有份量嘅歌手，雖然佢哋離開咗我哋，但係佢哋嘅歌仍然影響住成個華人樂壇！每次演繹佢哋嘅作品都會諗起以前嘅歲月，好多難忘嘅回憶。」

　為紀念成軍超過40年，佢哋唔單止會於4月再次於紅館開show，仲會推出一張四十首歌曲嘅大碟。三位成員蔡一傑、蔡一智和蘇志威接受了HOY主播Angela俞詠文的訪問，互爆秘密！談到剛剛完成上一個巡迴演唱會，已經馬不停蹄籌備最新的紅館個唱，三位即表示這是他們的養生方法：「我哋做演唱會就係我哋養生嘅時間，做完一次就後生一次！好過做facial喎！準備演唱會時，每日我哋就係做運動、跳舞、排舞、練歌！咁仲唔係養生！？」問到入行40年，一智就笑言以前覺得非常老：「Soold！即係以前覺得就算唔退休呀，都自動退休啦！都跳唔郁啦！點知原來只要自己唔放棄，就會做到同埋做！好似我咁，後生嘅時候跑唔到10公里㗎！過咗60歲之後反而仲跑到半馬！我都唔知點解？呢啲係咪叫做回春呀？」

　演唱會主題名為「Three in love」，問到互相覺得對方可愛之處，傑仔竟然覺得核突：「我哋大大話話都識咗60年，會唔會覺得對方好cute？我想嘔呀！哈哈哈！不過其實都有好可愛嘅時候嘅，好似蘇志威咁，平時好少同我飲酒，有一次佢飲大咗！係咁捉住我嚟錫！你哋睇落好似好sweet，但係我就會好似如來神掌咁樣推開佢！好鬼肉麻囉！」

　蔡一智就笑談傑仔經常「麥兜」上身：「佢成日去到雲吞麵舖就叫一啲唔應該有嘅嘢！即係例如漢堡包，真係好奇怪！又或者好似麥兜咁，人哋話，今日賣曬雲吞呀！咁佢就會話咁雲吞麵啦！蔡生麵都買曬啦！咁水餃麵呀！總之就係笑死街坊啦！」蘇老闆亦大爆蔡一智係「雙面人」：「我哋開會佢就好正經嘅，但係當佢個仔一打嚟嘅時候，佢就即刻cutie上身，同個仔好sweets weet咁喺度傾計，跟住一收線又正經返！」蔡一傑插嘴：「佢係對住你好硬，對住個仔就好軟，我對住佢？真係乜都硬呀！」期間主持人笑到眼睫毛都飛脱，傑仔以為是昆蟲，好有愛的把「它」撥開，之後才發現是眼睫毛！傑仔驚訝地說：「撞鬼囉！我以為係隻烏蠅添！你知啦，我老花呀嘛！哈哈哈」◇