賀歲片《夜王》氣勢如虹，票房已衝破九千萬！而眾多角色之中，除了主角歡歌（黃子華飾演）和V姐（鄭秀文飾演）受歡迎外，還有一位獲封為《夜王》MVP「葵芳」的蔡蕙琪（Kay）亦非常突出。HOYTV主播Angela俞詠文就找來阿Kay分享一下突然爆紅的感受。

　問到成為娛樂圈2026年娛樂圈第一個MVP，阿kay就表示驚訝：「我淨係想講新年快樂！哈哈哈！新年好！我令到大家紅上加紅！只係有咁樣嘅感覺！真係學電影裏面話齋，一言難盡呀！其實可以話係我個人演藝生涯中嘅一個里程碑，事業上嚟講，以我今年嘅年紀，應該啱啱好係一個人嘅事業，需要去起步嘅年齡，所以對我嚟講係一個好大嘅支持。」

　對於導演曾經在訪問中坦然，她是在一堆遺棄的履歷內掘出來，阿Kay亦知道這件事：「因為副導就話嗰堆人係「kam」嘅，咁導演一聽到「Kam」呢個字，就雙眼發光！跟住佢睇到試鏡嘅片段就笑咗出嚟！而喺設計「葵芳」呢個角色嘅時候，就同劇組嘅人，諗到用鄺美雲加林明禎呢個合體嚟塑造，呢個係一個方法令自己喺試鏡時都享受嗰個過程，當自己做唔到嬌嗲可愛嘅時候，就用另一個方法去投入！搵一個面具帶上去，將佢慢慢發展成為一個角色，最後就成就咗「葵芳」喇！」

　講到當中一個爆笑場面，就是「葵芳」喺出場前剃毛同時畫眉，阿Kay就笑言是爆肚：「其實呢個係現場度出嚟嘅！因為當時阿Fish飾演嘅Mimi媽，其實係教緊我畫眉，同一時間，我就喺度剃緊毛，所以我一手攞住眉筆，一手攞住剃刀！跟住阿卵楊偉倫就問我想點啫！先至有呢句對白！」

　說到將來的發展，阿Kay準備就緒：「嗱！我而家呢就係自由身嘅演員，我係冇隸屬任何劇團及公司，十八區我都會去！唔知淨係留喺葵芳！任何劇團，任何電影，有工作就搵我啦！唱歌就有啲抆水，音樂劇都可以考慮一下！哈哈哈！」◇