【特訊】英超周六早場，諾定咸森林主場0比3不敵車路士，上任僅39日的森林主帥普斯迪高路9月中至今未贏過，賽後即時被解僱；車路士今場贏波後各項賽事3連勝，重返正軌。

　森林今仗變陣，收起前鋒基斯活特，改用艾禾尼爾拍基比斯韋特，至於車路士領隊馬利斯卡今場坐波監，要在觀眾席搖控指揮。上半場森林攻勢較有效，基比斯韋特兩度埋門都把握不到，車路士今場用安達利山度士及阿歷真度加拿祖正選上陣，表現一般，半場互無紀錄。

　下半場車路士換入馬克基奧同摩西斯山度士即刻見效，49分鐘柏度尼圖左路傳中，小將阿捷岩邦近門頭槌破網領先1比0，3分鐘後間接自由球，列斯占士撥橫予柏度尼圖一射破網，車路士火速領先至2比0。

　森林其後力追，可惜伊戈捷西斯近門射中楣，臨尾列斯占士為車路士整多一球，尚有馬路古斯圖領紅牌被逐打少一人，但對大局無影響，最終森林淨吞3蛋完場，森林賽後即時宣佈，解僱主帥普斯迪高路。

　另外，昨夜戰至澳門時間今晨英超五仗賽果：

　白禮頓二比一紐卡素，般尼二比0列斯聯，水晶宮三比三般茅，曼城（夏蘭特包辦）二比0愛華頓，新特蘭二比0狼隊。◇