組合Soler日前到新城廣播接受梁兆輝（Brian）主持的《One Music Corner壹角樂》訪問，成員Julio和Dino在訪問中透露，此次重返樂壇原是向樂迷道別，並計劃以一場小型演出為20周年的音樂旅程劃上句號；然而，因外界反應熱烈，最終轉為復出。

　哥哥Julio坦言：「原本想趁20周年搞個細細哋嘅騷，主要想同大家講再見，因為之前我哋淡出，但一直未有正式同粉絲告別。」弟弟Dino補充道：「我哋希望以較完整嘅方式為呢段旅程畫上句號，冇諗到提出想法後，大家反應激烈，仲促成新歌《翻天覆地》同9月20日嘅澳門演唱會。」

　Soler強調此次回歸並非出於商業考量，而樂迷的反應更是超出他們的所望，Julio坦言：「係有啲愕然，之前咁多年來做新歌都冇乜反應，以為係咪有嘢罩住佢哋，唔畀佢哋聽我哋嘅歌，所以點解我哋話直接退出啦，用一個總結嘅概念，去總結我哋20年，點知大家都仲記得我哋，當然係好感動。」

　不過由於Dino已移居溫哥華7年，未來需要協調時間，但仍將以開放態度繼續音樂創作，他們特別感謝樂迷多年不離不棄，並承諾會繼續創作音樂與樂迷保持互動。此外，Soler也回顧了當年的合約糾紛，他們分享一位老前輩的提醒，指出當時問題的核心在於「上得太快」，必然會遇到相應的滑落，Julio表示：「佢話當時你哋上得太快，就算冇咩原因，一定會有啲現象令你跌落來，嗰一刻同公司唔愉快，佢話其實唔係呢樣嘢就係另一樣嘢，重點唔係你哋發生咩問題，係你哋上得太快。」

　談及2006年首登紅館，Dino表示：「我同Julio都曾經對太快登上紅館缺乏信心，覺得仲係太早，直到畀公司說服。」他們形容當時感覺：「似企喺唔穩嘅地上，有啲唔自在。」不過如今心態已變得更加穩定、踏實，能夠更成熟面對舞台。◇