【特訊】今季由曼聯外借到巴塞隆拿的拉舒福特，周一（4日）晚熱身賽客戰FC大邱攻入靚波，順利開齋，協助球隊以5比0大勝FC大邱，今次亞洲之旅3戰全勝，成績美滿。

　巴塞今場繼續強陣出擊，拉明耶馬、拉芬拿比洛尼與羅拔利雲度斯基組成進攻鐵三角，中場用加維拍法蘭基迪莊，對住韓職包尾的FC大邱，戰況一面倒。

　開賽21分鐘耶馬送助攻，加維禁區頂一射破網開紀錄，6分鐘後羅拔利雲度斯基擴大比數，完半場前加維整多粒贏到3比0。

　下半場巴塞換完11個，繼續壓住打，東尼費南迪斯54分鐘攻入第4球，65分鐘艾利加西亞右路傳中，拉舒福特門前第一時間撞射入網，巴塞大勝5比0完場。

　巴塞今次亞洲之旅3戰全勝，包括首戰對神戶勝利船贏3比1，7比3大勝FC首爾，以及今場贏FC大邱5比0，3場攻入13球失4球，加維累積3球成為此行神射手。◇