今年三月黃翠如同蕭正楠嘅囝囝「蕭哈哈」出世，話咁快哈哈已經100日大喇！日前，好有儀式感嘅翠如同阿蕭，就為囝囝喺淺水灣舉行一場嘅百日宴，邀請咗唔少圈中朋友出席，好似有陳山聰一家三口、楊茜堯、馬國明夫婦、黃日華，胡定欣、洪永城夫婦、方力申以及陳敏之等。

　敏之喺社交平台分享咗多張相片，並留言寫道：「美麗陽光燦爛的一天，美麗的媽媽，看見你們多幸福，大家都笑哈哈同樂」而翠如亦回應表示：「好開心呀，愛你」

　相中所見，哈哈百日宴舉行當日天公造美天朗氣清，翠如同阿蕭兩公婆就齊齊以白色裝束現身，而現場佈置就以彩虹為題，用咗五顏六色嘅汽球砌成一道彩虹波波，上面寫住「HAHA100DAYS」，而哈哈嘅百日宴蛋糕亦揀咗色彩繽紛嘅彩虹蛋糕，彌漫住滿滿嘅幸福感。◇