《香港何濟公止痛退熱散呈獻:中年好聲音3》周日晚播出一集,由獻唱《許願》的張與辰及姚焯菲獲得最佳分數95分,而本集由森美選出的MVP得主,則是以往唱出過不少佳績的陳芷盈。

　芷盈今次憑與何晉樂合唱的《誰明浪子心》奪得高度評價,除了因為二人默契十足,還因陳芷盈跳出ComfortZone玩突破挑戰說唱,另外她與何晉樂的超高音開場,也給出了一定的記憶點。肥媽:「好高興睇到芷盈力量型,好surprise芷盈可以Rap到。」海兒:「個balance做得非常之好,goodjob。」森美「我聽到擘大咗個口,Rap好容易好老土,但你一啲都唔老土,好有型。你能夠衝破到自己就要加分喇,你做到嗰種我要表演畀你睇,我唔怕我係咪做得到,呢個想表演嘅心我哋係睇得到嘅。」對芷盈讚不絕口的森美,最終亦將MVP頒予芷盈,而首奪MVP的芷盈自然相當激動,並含淚感激所有支持自己的粉絲及網民:「今次我Rap,係一個好大嘅突破來。呢段日子真係唔容易,因為屋企人入院、成日都來來回回,都唔夠時間練習...同埋我想多謝我嘅Fans同網民朋友,因為好多同學仔成日都話好想我攞MVP,今次我得咗喇。」

　另一贏盡好評的演出,還有李金凱/冼靖峰的《甲乙丙丁》,friend到不得了的二人,全程散發著青春愉快的Energy,不時搭膊頭唱歌仔之餘,還親密到一支咪兩份唱;亦因為這個舉動,令二人獲得張佳添高度評價:「兩個人share一支咪,兩把聲都入到咪仲要咁夾,係神來之筆。雖然你哋take咗個risk,但呢個risk係成功嘅,個化學作用好正、好warm。」「手緊王」周國豐亦笑言不能不給高分:「頭先好似睇緊《聲夢》(比喻金凱唱出年青感)比賽咁,你哋真係好享受,而你哋享受之餘,亦令到我哋都好享受,呢樣梗係值高分!」周國豐更笑言二人的演出似「開篷車」,生動地形容了二人唱出的relax感。另被指《中年3》顏值擔當的趙浚承,更獲得周國豐睇好能殺入決賽:「你成件事呈現係啱晒數,浚承你今日嘅中低音好好聽,我好希望浚承你記住你呢種作戰狀態,咁就有機會衝入去Final!」◇