唱作歌手黃明德（Dark）推出全新單曲《巨人之力》，一如以往由他親自作曲，今次更參與編曲部分。歌曲以「成長的掙扎」為主題，將現實步步緊逼下、披上盔甲長成連自己也感到陌生模樣的無奈，化作一場翻天覆地的地鳴。Dark直言今次作曲是他眾多自己寫的作品中「最smooth、最快完成、改得最少」的一首，他指新歌有別過往輕快風格，以較重型搖滾姿態呈現，「有啲似動漫主題曲，不過係廣東話版。」

　歌曲最想表達的是成長無力感，Dark坦言是那種踏入社會前想像與現實越走越遠的落差，「好多你付托咗真心出去嘅時候，原來人哋未必都係咁樣對你。」他透露自己出道早，未經歷過社會「毒打」便入行，一直以中學時期認識朋友的方式與圈中人相處，「好多時好多呢行嘅人會大過我，佢哋嘅閱歷會多過我，好多嘢我都唔識。」他坦言過程中發生過不少不開心時刻，「例如我真心對呢個朋友，但係原來佢都唔係當你朋友，或者你覺得所有人都可以當做朋友，但其實有啲人係唔可以令到你咁樣做。」Dark又謂入行前以為做歌手「真係齋唱歌」，「但係原來有好多嘢啦，fans嘅管理、形象、自己嘅行為、Social Media經營，甚至乎講得通俗小小，就係你要識玩呢個遊戲。」他感嘆單靠努力鑽研唱歌和音樂，未必足以突圍而出，「你要知道你要花好多時間去思考觀眾喜歡啲乜嘢。」

　歌詞提到「既然這個世界逼人太甚 我們決意變身巨人 破開矩陣」，Dark指現階段最想突破的「矩陣」，正是安於現狀的自己，「而家已經出道咗第五年，慢慢開始有小小磨蝕咗，或者冇一開頭嗰一、兩年咁有衝勁，咁想去達到某啲嘢嘅時候，就想破開呢一樣嘢，破開自己畀呢個世界或者周圍去磨蝕自己。」他承認自己需要強硬一點，但同時覺得這與成長本身存在矛盾，「你要識得點樣去強硬得來唔好令人覺得你太強硬，其實都係一樣好難嘅事，亦都係一樣我諗一生嘅課題。」他續指，這一年最大得着是學識勇於表達自己，「真係發現咗自己唔講，呢啲人係唔會知、亦都唔係個個咁得閒理你，其實係冇人理你㗎，你要講，咁人哋就會聽。」◇