由新世界娛樂呈獻《大AL的音樂歷程》演唱會日前在數碼港商場中央表演場舉行，圈中不少好友出席支持，而林寶玉、姚正菁除撐場外，菁菁更首度公開獻唱，寶玉自製Fans牌成為呢次演唱會焦點！

　大AL上台時，好友台下不斷歡呼拍掌，一連唱出多首金曲《Golden Slumber》、《One day》等，台下觀眾掌聲如雷，氣氛非常熱烈。騷後大AL都感謝各方好友支持舉行個唱：「全靠今次主辦Sam哥、資深音樂人粉哥精心製作及策劃，得到多方好有鼎力支持！特別係菁菁做嘉賓，真係估唔到佢初達台版表現非常出色、唱得咁好，除咗演戲之外唱歌都非常了得！其實去到而家呢啲年紀，開騷都似係朋友聚會，大家見下面重要啲！」

　早前透露正上堂學唱歌嘅姚正菁，呢日狀態滿分，首度公開獻唱《親密愛人》成為全場焦點：「出場前我緊張到震晒，我都好擔心唔知大家咩反應，而家感受到上台嘅樂趣，我應該會更加鍾意唱歌，亦都明白老師之前教我嘅小技巧！我問寶玉畀幾多分我，佢懶神秘唔講，不過要經理人夠嚴格先有進步嘅空間！」

　而同場嘅林寶玉就表示早前二人前往新加坡拍攝，為即將派台新歌拍封面照：「我都乘機影啲靚相，因為其實我稍後時間會經理人、藝人兩邊走，不過詳情就梗係賣個關子先，所以我都要準備做運動，準備以最佳狀態去見人！」佢就話呢日姚正菁表演超出佢預料之外，大讚對方係「被愛情耽誤」嘅歌手。◇