昂坪360二十周年，大推纜車夜航體驗，昨日舉行首航典禮，請來人氣女神佘詩曼（Charmaine）坐鎮，更以超吸睛盛裝閃爆長裙現身，靚到似行紅地氈！她更擔任昂坪360二十周年宣傳大使，聯同一眾主禮嘉賓一同進行亮燈儀式，慶祝為期八晚的「纜車夜航」正式啟航！

　活動上播出Charmaine為慶典拍攝的宣傳片，片中與資深演員程可為大演母女情，溫馨滿瀉。巧合的是，20年前昂坪360開幕之年，正是Charmaine首奪「視后」的大日子。Charmaine感觸笑言：「真係有種互相見證成長嘅感覺！20年來，我覺得自己嘅演藝路同昂坪360嘅發展好似，大家都係咁拼命尋求進步創新，但又好重視本地文化情懷。」

　提到拍攝宣傳片過程，首次夜晚坐纜車，欣賞大嶼山夜景，她極力推介首次體驗的「夜航」：「由高空望住機場、港珠澳大橋同大佛嘅夜景，同日頭完全兩個世界，夜晚多咗一份浪漫嘅感覺！成個昂坪亮晒燈，好浪漫，適合一家人或者情侶來撐枱腳。」

　今次活動，昂坪360首次改裝退役纜車「落地」化身打卡裝置，Charmaine完騷後在退役纜車前接受訪問，未開口已引來數十名粉絲聞風而至，瞬即將現場圍得水洩不通。有人高舉自製應援牌，有人瘋狂尖叫「阿佘你好靚呀！」，場面墟冚。

　向來寵粉的Charmine見更主動行近欄杆同粉絲selfie，引來全場暴動，仲同粉絲一齊大合照，氹到粉絲勁開心！

　最後亦藉機鼓勵現場人士記得要趁住二十周年慶典期間帶同另一半和小朋友來玩轉「日與夜」，除了體驗今次的纜車夜航體驗，亦可以到昂坪市集欣賞霓虹燈飾，與摯愛親朋留下愉快回憶。◇