資深演員梁珊於7月1號與世長辭，佢嘅囝囝Alex將媽咪死訊通知親友，並表示珊姐後事嘅具體安排，將稍後再作通知。

　珊姐自幼喺廣州長大並擁有唔錯嘅家境，當初入行時亦受任職律師嘅父親反對，最後珊姐向父親保證自己會「出於污泥而不染」先得到同意入行。

　珊姐於上世紀六、七十年代出道，由國語片年代到接拍電視劇，佢喺TVB嘅第一套劇集係《天虹》。由於珊姐演活唔少潑辣角色，所以有「御用惡女」之稱。喺珊姐演過嘅芸芸角色中，最令人印象深刻就係《新紮師兄續集》飾演曾華倩嘅惡媽媽！

　珊姐對演藝事業要求高，抱住「演員應該清楚唔同崗位嘅工作性質」態度，而做過場記、副導演同剪接等崗位，直到由80年代開始投身舞台劇演出。

　喺1999年之後，珊姐就減產幕前工作定居加拿大，近年不時返港跟好友團聚。珊姐憑性格爽朗深得後輩敬仰，好似未同珊姐合作過嘅袁文傑，都勾起同珊姐見面時嘅爽直對話。袁文傑表示，珊姐經常話：「喺呢行做過我個仔嘅演員全部都掂，你又未做過我個仔，睇有冇機會啦。」

　珊姐遺傳爸爸嘅正義感，眼見有問題，唔理對方係咩身份都出聲糾正，令唔少幕後同事跟演員對佢退避三分，不過珊姐就喺接拍《楚留香之蝙蝠傳奇》時，因為見多識廣又招積以及保護弱小性格，獲苗僑偉冠以「降落傘」稱號。

　珊姐嘅經典作品同令人難忘嘅角色，將會永遠留喺觀眾嘅心中。◇