由洪永城(Tony)、黃翠如(Priscilla)主持的旅遊資訊綜藝節目《中國建設銀行(亞洲)呈獻:走過歷史大地》，二十六日九點半翡翠台播出最後一集。

　兩集最大賣點，是出名「地獄廚神」的翠如，竟然走入工人餐廳廚房重地，炮製法式高湯及工人餐。自稱學過一個鐘頭藍帶課程的翠如，大顯身手期間相當分心，除因樣子似足「AI歷史人物」的大廚笑個不停，又因高湯法文發音與普通話「不用」相近而與Tony打鬧一番，過程爆笑。工人餐廳除了主打靚食材及靚裝修，還有靚女女侍應，令Tony見到一度心心眼，想知有幾靚，就要留意節目。

　另一Part有趣互動，是二人在這個網球發源地，與當地高手打了一場混雙，期間Tony全程打得有板有眼，不但幾乎球球都接到，而且打球姿勢相當標準兼瀟灑，與在圈中公認是「運動體能黑洞」的翠如相映成趣，翠如不但全程企喺度得個講字、仲要完全零意欲接波，令Tony焗住兩邊飛撲救亡，畫面有趣。其實Tony在節目中打網球打得咁靚，完全有根有據。Tony自幼熱愛網球，球技在演藝圈中名列前茅，近年為積極推廣網球，曾發起「中國香港藝人網球聯盟(ATEAM)」慈善活動。

　節目尾聲，Tony與翠如齊齊收起佻皮，感性大談相隔七年再合體拍攝《走過》感受。由於《走過歷史大地》，是翠如升呢人母後首個拍攝的綜藝節目，故她坦言希望節目是留給寶貝兒子哈哈一份別具紀念價值的禮物:「將來BB長大咗，好想畀佢睇，想佢畀啲朋友睇，希望節目入面嘅故仔可以延續，希望我嘅故仔都可以延續。因為有一日我都會變成歷史架嘛，我希望我去到變成歷史嘅時候，我唔會淨係一張相，對於佢哋來講，我都係一個可以分享嘅故事。」◇