早前布志綸舉行個唱叫好叫座，日前宣佈舉行Part2《Rock’s Going On! Pt.2 Deluxe Remix》音樂會，將於7月25日假座於Backyard@AXAWONDERLAND舉行！Alan對於「Part2」相當興奮，仲保證歌單會有意外驚喜：「今次Part2嘅歌單除個人作品外，都會揀啲歷年來我創作、耳熟能詳嘅經典。除咗基本嘅Rock元素，唔少歌曲我會重新改編，帶畀大家好多意想不到嘅驚喜同層次，包保大家會有新感覺！」

　呢次音樂會戶外舉行，Alan預期氣氛夠晒「Chill」：「戶外騷邊飲邊食最緊要今次除咗Band之外，仲邀請咗DJ做Remix，希望撞到啲新火花。（團員會上台？）屋企人一向都好支持我，今次戶外騷佢哋都會來感受下氣氛。阿仔而家慢慢大個，佢成日都好想表演，但係都要睇佢自己肯唔肯練習，今次未知道會係點，暫時要求佢做返台下觀眾，睇下老豆同咁多人一齊Rock嘅場面，同大家一齊Chill、一齊享受音樂先！」

　Alan就話一場「唔夠喉」，歌單有太多選擇，但團隊將所有精力「精煉」到台上：「好多歌迷真係陪住我一齊成長，經歷人生嘅高低起跌。睇住大家由當年小學、中學、大學生，到而家踏入社會、甚至做埋父母，呢十幾年來大家一齊經歷咗好多。我希望今次音樂會除咗勾起大家『聽住我啲歌長大』嘅共鳴，最重要係帶畀大家好歡樂、好正面嘅力量去面對人生。音樂本身就係最好嘅『天然能量補充劑』，只要享受好音樂，心態自然會年輕。年齡嘅數字從來唔係問題，體力交畀我，最重要大家開開心心去Enjoy音樂。」◇