劉松仁同米雪呢對螢幕CP演繹不少經典作品，即使兩人減產幕前演出，彼此友誼多年不變。松哥最近喺社交平台以「欠米雪小姐一句『謝謝』，為甚麼呢？」為題撰文。

　松哥話年輕時拍戲，對創作認真執着，一進入狀態就會旁若無人、不能自控，誰都不能打擾，要嗰個時候被打斷，佢就會發脾氣，但自己完全冇覺察，並不在意。

　直到多年後同米雪傾偈，米雪坦言松哥那些年喺片場得罪咗好多人：「很多人受不了你，都是我在背後幫你解釋、打圓場」。松哥聽到之後心裡好觸動，呢啲事從頭到尾都唔知道，因為嗰時自己一心撲喺創作上，人情世故完全顧不上，根本意識唔到。

　松哥感激米雪一直包容佢嘅急躁與固執，從來冇半句怨言，仲話當時米雪係比自己紅嘅一線演員。松哥回想當年試過喺片場情急之下，試過對米雪呼呼喝喝，真係不知天高地厚、不近人情，令米雪受唔少委屈。松哥多年後覺得自己不只欠米雪小姐一句「謝謝」，今日仲想認真同米雪講一聲「對不起」。◇