湯怡（Kathy）母親節嗰日都有參加Hyrox，以下是她的感受。

　Kathy說：「其實今次係第一次玩Hyrox，事源就係我IG突然之間彈咗關於Hyrox嘅嘢出來，就問經理人其實難唔難玩㗎，講講吓就諗住同佢兩個一齊玩。係比賽前一個月左右先發生呢件事，第二日就報咗名。其實結咗婚有小朋友之後同之前嘅生活真係好唔同，一直都好想做返以前做嘅嘢，例如跑馬拉松或者做返gym，所以今次係一個開始來嘅。

　我一開頭都有諗過同老公一齊玩，但因為佢做緊巡迴關係，唔喺香港，同埋原來男仔同女仔一齊做嘅話，女仔係要做男仔嘅重量，呢個對我來講一開頭來講係會有啲吃力，所以我點都搵個女仔一齊玩先，所以就搵咗經理人啦。

　當中最辛苦係要pickup返做運動，雖然自己跑開步，但我大髀力量係好弱，今次Hyrox八成嘅都係用隻腳去做，所以呢個對我來講都係有啲吃力。其實我買咗成set啞鈴喺屋企，但因為真係太忙，買咗返來淨係擺，哈哈。

　其實Hyrox係分三日，我特登揀母親節呢一日，一來係畀自己一份嘅小禮物，二來我都想QQ睇住媽咪做呢個挑戰，佢來咗同我打氣，佢見到我不停喺度嗌：「媽咪加油、媽咪加油。」對於我來講其實好開心好鼓舞。

　Hyrox嘅氣氛同跑馬拉松好唔一樣，跑馬拉松可能你到終點先有機會見到自己嘅朋友、屋企人，雖然從來都未試過，哈哈。今次所有屋企人朋友喺場館入面，做每個Section、Station，都見到佢哋，所以個感覺真係兩回事。

　母親節禮物，QQ寫咗張卡、自己畫咗幅圖畫畀我，同埋佢喺學校整咗份小禮物畀我，係個筆插，但送完畀我之後佢自己拎返，哈哈，佢話係佢自己㗎喎，不過唔緊要嘅，因為佢而家識寫字又識表達，呢個對我來講係好開心。

　我覺得下年我會再玩嘅，不過要真係抽多啲時間認真去鍛鍊返自己，但同老公一齊玩呢個就我要說服到老公先，二來我要比而家更加強勁，因為我要做埋男人嗰個重量，所以努力一下先。」◇