去年「死過翻生」嘅Jackie呂頌賢亮相HOY《娛樂頭條E-News Headline》接受主播Angela俞詠文嘅專訪，Jackie看上去精神奕奕，佢分享如今身體已恢復十成，感覺好似重生般，來探班嘅敖嘉年就大讚好友靚仔過以前。

　Jackie去年因肺部細菌感染擴散至多個器官，一度昏迷留醫深切治療部，搶救14天後才康復出院，體重暴瘦約40磅，他指如今身體好了很多：「之前身體不舒服，依家努力恢復中，都差唔多十成。」體重亦開始恢復，嘉年大讚：「仲靚仔過以前，感覺好似人哋生小朋友咁，REBOOT一次。」Jackie也點頭稱是。之前佢接受嘉年主持嘅《橫素全中國》節目大談素食經，分享卅年嘅素食之道：「我點解食素？無咩原因喎，（唔覺得好Dry咩？）一啲都唔Dry，大家唔好誤解吃齋就係青菜豆腐，無乜味，其實唔係㗎，大家可以去見識吓，十年前已經有新式素食，各種花款，調味都無問題嘅。」問到他會自行下廚還是出外品嚐美食？「我都係鍾意出街食，（老婆會否下廚煮兩味？）佢都係出街食多，試唔同嘅花款嘛﹗」

　Jackie同嘉年唔單止都係素食愛好者，更是鄰居，喜歡一起揸電單車慢遊，「依家唔會追求快感，唔會風馳電掣，係風和日麗，哈哈。」他又謂以前可能會追求車款，如今就覺得有合適嘅就足夠，安全至上。◇