湯鎮業為翁美玲之死被鬧足40年，曾背負「負心漢」罪名，二人當年因拍電視劇《十三妹》而撻著，於80年代曾有過一段情，翁美玲離世40年，湯鎮業早前接受楊紹鴻網上訪問，罕有剖白內心感受。

　翁美玲當年憑《天師執位》及《射鵰英雄傳》大受歡迎，憑俏麗外型、出眾演技，令其演藝事業達到巔峰，當時翁美玲與湯鎮業相戀，有傳二人因工作忙而聚少離多，導致情海翻波，翁美玲被發現喺九龍塘家中輕生，湯鎮業背上負心漢之名。主持楊紹鴻坦言一度嬲過湯鎮業，問到湯鎮業翁美玲走後，有冇要「搵地方匿」。

　湯鎮業直言嗰陣肯定好低落，承認當年受到千夫所指，兩、三年冇接觸娛樂圈，嗰時零收入冇嘢做，成個人好低落，當時獲家人同阿哥陪住。楊紹鴻當年喺好友翁美玲走後，楊紹鴻曾寫字條「阿翁點解你唔返來見我」，再去後樓梯燒字條，主持問到翁美玲有冇報夢畀湯鎮業，湯鎮業就話：「冇，可能佢唔想煩我，亦唔想煩你。」主持楊紹鴻亦奉勸大家件事已過去40年，誰對誰錯真係唔知，又唔係當事人，唔好再用自己直覺去考究！◇