陳展鵬 Ruco Chan 與太太 單文柔 Phoebe Sin  婚後誕下女兒「小豬比」陳諾瑤（Quinta），單文柔就主力相夫教子，不時為老公展鵬及愛女小豬比製造驚喜，單文柔近日喺社交平台分享一家三口出海拍攝嘅聖誕全家福，面對阿女升Year 1後，玩樂時間短咗，單文柔坦言唔係虎媽，但係小豬比樣樣都話要學，令時間表排得好滿！

　當日單文柔身穿低胸裙，愛女小豬比著可愛白紗裙，而展鵬著上型格西裝，跟老婆及愛女開心擺拍，單文柔感性稱呢一年對好多人都好唔容易，經歷過起起落落，令人更懂得平安係最大嘅福氣，「風浪裏面 只要仲有家人可以緊緊牽住手，仲可以真摯咁望住對方笑一下，就已經足夠溫暖、足夠有力」。

　單文柔覺得與家人簡單相聚，唔奢求隆重嘅慶祝，只想靜靜講一句「平安夜快樂 」就夠，祝願新一年大家身體健康、平平安安、開開心心咁過好每一日。 

　單文柔睇番呢輯相，見到阿女開心嘅笑容，亦有感而發，指阿女升上Year 1後，影相少咗，玩樂時間短咗，不過佢同阿女一齊努力學習嘅時間就多咗，單文柔平日要同阿女趕功課、夾時間上興趣班、check通告、追進度，「其實我真係唔係虎媽，只係佢樣樣都話要學，但一日得24小時，婆婆姑婆起初都唔太明白，真係有啲喊冤」，可見單文柔平時照顧阿女，真係忙過不停！◇