古天樂、胡子彤及張文傑原定於下月代表電影《九龍城寨之圍城》，出席喺12月5至7號假東京幕張舉行嘅東京動漫節（Tokyo Comic Con 2025）。

　三人於28號穿上黑衣拍片宣佈將取銷行程缺席東京動漫節，古天樂一臉肅穆表示：「由於香港大埔發生嚴重嘅火災，造成重大嘅傷亡。全港市民包括我哋深感悲痛，喺呢個沉重嘅時刻，我哋實在冇辦法抱住正常嘅心態出席今次嘅活動，所以我哋將不會參與12月5號，同埋6號喺Comic Con嘅活動。希望原本計劃出席活動嘅朋友，以及受影響嘅相關單位能夠體諒，我哋深感歉意。最後希望逝者安息，傷者早日康復。」

　而東京動漫節亦喺社交平台發聲明指，表示古天樂、胡子彤及張文傑喺緊急通知下取銷行程「因應香港於11月26日星期三發生的大規模火災，由於災情需要被高度重視及關注支持，因此需要修改原定日本之行。」事件難免影響入場人士，所以主辦亦代表向已購票嘅出席者致歉「希望大家能夠體諒香港目前的狀況。我們會禱告紀念每一位受災情影響的人。」另外，張文傑於限時動態中公佈，其個人生日粉絲見面會，亦會延期舉行。◇