大埔宏福苑五級致命大火，造成多人死傷，大批居民痛失家園，全香港彌漫著一片哀愁。面對近年最嚴重嘅火災，各界都伸出援手，唔少藝人喺網上平台發文送祝福，並向遇難者同殉職嘅消防員致哀。好似胡定欣、胡杏兒、黎耀祥、袁詠儀、陳山聰、高海寧、王嘉爾、姜大衞、古巨基、陳偉霆、陳慧嫻、李佳、姚子羚、占士丁丁、黃劍文、梁思浩、汪詩詩等，阿Sam許冠傑更親筆寫祈福字條，向大埔居民打氣。

　而台灣藝人吳慷仁，亦發文送上祝福，亦有藝人幫忙轉發救援資訊，江若琳同老公蕭唯展更立即行動，通宵開放位於大埔嘅食肆，為受災嘅居民提供免費食物同飲品。

　受火災影響，原定舉行多個娛樂活動都宣佈延期或取消，受影響嘅活動包括佘詩曼聖誕亮燈活動、陳家樂同太太連詩雅嘅聖誕活動、謝寧新店開幕活動、粵劇特朗普記者會、《優獸大都會2》電影首映禮以及陳凱詠演唱會售票等等。

　韓國年度音樂盛事《2025Mama Awards》，主辦方經過多次會議後，決定低調。

　11月27日結婚嘅容天佑，原本安排見傳媒環節，但最後一對新人決定取銷訪問。英皇娛樂亦宣佈曾傲棐、許靖韻、洪卓文嘅三個音樂會會延期舉行。至於林曉培同鄧健明原定11月30日舉行嘅搖滾演唱會，演出同樣將會延期。

　至於29號將於紅館舉行演唱會嘅楊千嬅，經過同團隊慎重商討後，因檔期同製作限制無法調整，加上好多來自世界各地嘅歌迷已安排機票住宿，所以演唱會將如期舉行。但就呼籲歌迷，將購買花藍嘅款項捐作救災用途。另外首場演唱會收益以及周邊商品全數盈利會撥捐東華三院，支援救援同重建工作，至於演出內容上亦會作出調整，取銷煙花特效等。

　譚俊彥呢日開工時，亦有為受火災影響嘅居民送上祝福，並呼籲大眾可以集氣，保祐所有災民，佢亦衷心感謝消防員及救護人員盡心救災。

　正所謂一方有難八方支援，李嘉誠基金會捐出3000萬元，設立緊急援助基金，並將撥出額外5000萬元重建社區，而李兆基基金會就捐出3000萬元，周大福集團宣佈捐出2000萬元，香港小米基金會同騰訊公益慈善基金會各捐出1000萬元。◇