【特訊】英超周六（12日）早場，曼城主場鬥水晶宮變成入球騷，「藍月亮」在先失兩球下，以5比2反勝全取3分，暫時重返前4，不過現時3至7名咬得很緊，歐冠資格之爭有得鬥。

　「藍月亮」今場落筆打三更，開賽僅8分鐘即被水晶宮撕破後防，伊比爾治伊斯輕鬆開紀錄，21分鐘右閘基斯李察士再來一球成2比0，之後伊比爾治伊斯再入波，但越位在先食「詐胡」，水晶宮氣勢被打窒，不用輸多粒的曼城展開大反攻，先有奇雲迪布尼31分鐘直射罰球建功先追1球，5分鐘後馬莫殊扳平2比2完半場。

　下半場曼城氣勢如虹，47分鐘高華錫閃電入波為主隊反超前3比2，其後是兩位小將的表演時間，先有占士麥艾迪單刀扭過門將射空門成4比2，之後尼高奧雷利凌空撞射拉開比數，曼城贏到5比2完場。

　另外，昨夜英超賽果：

　白禮頓二比二李城，森林０比一愛華頓，修咸頓０比三維拉。