1971年投考第一期藝員訓練班嘅陳喜蓮，喺70年代開始先後參與多部電視劇。喺80年代初就息影專心照顧家庭。喜蓮姐多年來熱心行善，最近仲參與仁濟醫院嘅「遺產捐贈計劃」，而佢嘅偶像黎耀祥咁啱係活動大使，拍攝宣傳片當日促成兩人見面。喜蓮姐話期待咗呢日好耐，祥哥話好榮幸獲大師姐賞識，亦係對自己好大鼓勵。

　祥哥話十幾、廿年前喺藝進同學會嘅聚會中見過大師姐，但因為輩份問題唔敢上前打招呼。兩人首度正式見面，喜蓮姐話諗梗要叫「祥哥」定「祥仔」，喜感十足嘅喜蓮姐話睇樣覺得祥哥比佢年紀大，但自己就輩份高，所以都係叫「祥仔」。

　當祥哥話自己有欣賞過大師姐作品時，喜蓮姐又爆肚話「咁大個大話都講得出。」祥哥即時話自己睇TVB嘅劇大。問到喜蓮姐有冇戲癮時，佢話若果同「祥仔」合作就好，仲提議做兩夫婦或情侶。

　喜蓮姐今次參與遺產捐贈計劃，將自己所擁有嘅幫助更多有需要嘅人，佢解釋因為父母都離開咗，而佢自己留底嘅嘢如果可以幫到人就係最好，加上一早安排好就更安樂。多年來都積極行善，佢話自己對演藝事業唔進取，反而天生鍾意做善事，因為幫到人比受惠者更開心。由於以往事事親力親為，影響肝臟，近年就惜自己多些，注意健康及做運動。◇