梁茵（Kiko)有份參與的HOY首個自家微短劇《我家有囍事》，正播放得如火如荼，當中和林德信(Alex)、林穎彤在劇中的三角關係，更成為網民熱話。為滿足追劇嘅觀眾，逢周日會推出一氣呵成版，讓觀眾一次過睇足十集，過足戲癮。在戲中飾演「拜金女」的Kiko為自己的角色平反，更加分享箍住男朋友的妙計：「今次我飾演嘅角色叫做愛美麗，聽個名就知道好貪靚啦！同我之前呢個角色都有少少類似，都係拜金主義嘅女仔，一見到Alex呢一類太子爺，可愛得嚟又迷人，又有錢又靚仔加上聲線溫柔，所以喺裏面我係會有幾幕色誘佢，本來諗住可以同佢開花結果，所以成個關係都係我Lead住佢嘅！」

　拍劇嘅時候，通常都做些拜金女的角色，現實當中，Kiko對防止男友偷歡也有一套獨有的方法：「要得閒幫佢放電囉！哈哈哈！呢個係令到關係走得更遠嘅方法，得閒同佢做下運動呀...我嘅意思係跑步呀！我嘅角色雖然係好豪放，但我自己其實係冇咁主動，以前覺得呢啲嘢應該係男仔做嘅，但係而家男女平等，所以有時真係要為伴侶炮製啲浪漫驚喜囉！」

　Kiko除了幕前的工作，她還擔任餐廳的實習店長，希望將來有機會開舖：「個個都以為做店長唔使做，其實最忙都係佢！因為我之前做個侍應同埋樓面，其實唔係想像中咁易，我哋本身係從事演藝，突然要轉去另一個行業，我哋花費嘅時間，係比其他人多，亦都要長期努力，先至可以得到別人嘅認同！而自己開舖頭就係我終極嘅目標，亦都有幾位Partner喺度協調緊，希望可以早日成事啦！」◇