許靖韻（Angela）日前於佛山完成今年巡演首站，音樂會上，Angela除了大唱多首代表作，更向fans們來個深情剖白，分享這兩年巡演的心路歷程，又預告已密鑼緊鼓準備新歌，更希望今年在港開show。

　Angela內地巡迴音樂會的佛山站，對她來說別具意義。她坦言這個音樂會就如她這段時間的精神食糧，「佛山站Show特別地不捨，因為呢個巡演好似陪伴咗我都一至兩年，好似係我呢一段時間嘅一個精神食糧。所以每次見到歌迷都係一個期待，好多謝佢哋一路俾呢個期待我，多謝佢哋嘅陪伴。」她直言雖然很多人因翻唱作品認識她，但她希望大眾記住：「我係歌手許靖韻。」

　談到今年計劃，Angela透露正製作新歌，目標是突破慘情歌路線，「想出慘情歌以外多啲唔同類型嘅作品，可能會係一啲比較bandsound類型。其實之前，我諗五、六年前有出過，《琢磨》同埋《被討厭的勇氣》，可能係一啲比較正能量嘅歌，而家仲係製作當中，希望今年可以多啲唔同類型，快歌又得。」她又提到自己一直有寫歌，並希望今年有機會推出至少一首自己寫的作品。

　除此之外，於香港開show亦是今年的目標之一，「好多年冇喺香港開show，當然好想，因為一路巡演嘅時候見到好多留言，問幾時會有香港站？會唔會有香港場？自己都好希望，亦都一路有同公司溝通，希望今年係會實現到。」◇