【專訪】兒童節園遊會即使天氣又熱又濕，還要排長龍，都無阻小朋友玩遊戲的興致，十多個遊戲攤位都人氣鼎盛，盡情投入。有小朋友開心稱，好開心，滿載而歸，有造型搶眼的工作人員稱，最重要是小朋友玩得開心，幾熱都無問題。

　本報昨日上午假盧九公園舉辦第四十五屆「六．一」兒童節園遊會，十多個攤位遊戲都是人龍，小朋友同家長齊齊等，期間，小朋友目標是希望前面小朋友「玩快啲啲，快啲到自己」，心急表情盡顯，但身旁的無論是爸爸、媽媽、或婆婆、嫲嫲，基本動作離不開幫小朋友抹汗、撥扇、叫飲水。昨日不少都是攜老扶幼三代同堂到場支持。有小朋友話，同婆婆、媽媽一齊來玩，又話每個攤位遊戲都好多人。九時四十分左右到，在十時半才玩到一個遊戲，贏了文具同玩具禮物，好開心排隊時覺得好熱，出晒汗，不過，都係想繼續玩。該小朋友媽媽稱，自己讀小學時媽媽都有帶來玩過，雖然遊戲簡單，現在仍有小時候的味道，對華僑報兒童節園遊會好有親切感。

　昨日有十多個攤位遊戲，分佈在園內不同地點，而負責攤位遊戲的工作人員有學校學生，有社團人員，全部都十分投入跟小朋友玩遊戲，贏了遊戲的獎品大份啲，仲有得讓小朋友自己揀，有小朋友贏了遊戲，更揀到心水禮物，歡喜地話超級開心，就算輸了，無問題，都有小禮物。

　有學校小六生表示，昨日八點半已經集合，再準備到會場幫手，雖然企了一個早上，期間要維持秩序同派發小禮物，但都不覺辛苦。

　十多個攤位遊戲為了吸引小朋友「幫趁」玩，每個檔位都經過悉心佈置外，更有攤位的工作人員作悉心服飾造型打扮，希望吸引更多小朋友。其中澳門創意形象藝術協會相當搶眼，因為小朋友未到攤位，已聽到從攤位傳出幾名叔叔同小朋友玩遊戲時的歡呼聲，再遠遠望過去，身穿黃色衫褲加個爆炸頭髮造型，還不時玩下雙節棍。難怪不少小朋友都話要排隊同搞笑功夫叔叔玩，因為啲遊戲簡單客易贏到禮物外，公仔禮物好吸引。至於該位好受小朋友歡迎的黃衫黃褲加個爆炸髮型的叔叔姓李。他稱，雖然天氣又濕又熱，都無問題，最緊要是小朋友玩得開心。◇