薛家燕將於下周六（二十九日）在澳門威尼斯人金光綜藝館，舉行由六福珠寶呈獻：《薛家燕愛你無限六十年演唱會》。開騷前家燕姐不敢鬆懈，連日來忙於綵排練氣。她透露今次澳門站會加插全新的「登基」環節，而好友米雪及王祖藍亦百忙中抽空來做嘉賓。

　家燕姐話：「好大壓力，好緊張呀……啲嘉賓咁賞面，我好欣賞米雪喺舞台上嘅演出，香港觀眾睇佢拍劇多，但佢載歌載舞就好少睇到，我同佢走埠好多次，默契十足，我哋嗰part會中國古典色彩濃厚啲。至於祖藍，相信大家都有睇過〈Sunday扮嘢王〉，我哋係扮嘢好拍檔，攞過好多次獎，希望會帶俾大家驚喜啦！」

　家燕姐綵排時，女兒曾因為擔心她邊唱邊跳太累，要求她只排練跳的部份，到正式才「真」唱，但家燕姐一口拒絕︰「我話唔得，因為我有個習慣，排舞時一定要唱埋歌，否則到時上台又唱又跳至發覺啲唞氣位唔啱，仲唱到喘氣，所以我寧願綵緋時辛苦啲，因為我排十次，就唱足十次，自己熟能生巧，又可以練到氣。」◇